أهمية الجورنالينج للصحة النفسية والعقلية
لما بيتعلق الأمر بالصحة النفسية والذهنية أو بمعني أبسط المشاعر والأفكار
فمعظم الناس بتواجه تحدي كبير في التعامل مع القلق والتوتر.
وبنبدأ ندور على وسائل وطرق فعالة للتعامل مع تأثيرهم السلبي على حياتنا اليومية.
وهنا بتيجي قوة الجورنالينج كأداة فعالة في مساعدتنا على التعبير عن أفكارنا ومشاعرنا
ومساعدتنا على التخلص من القلق والتوتر.
الجورنالينج هو تقنية بتحفزنا على كتابة أفكارنا ومشاعرنا وتجاربنا اليومية.
محتاجة مننا تفكير عميق وكتابة الأفكار والمشاعر دي بشكل منتظم في مذكرة أو دفتر يوميات خاصة بالجورنالينج.
احنا هنا بنستخدم طريقة التفكير التحليلي والمنظم في كتابة أفكارنا في الجورنال
وده من أهم الأسباب اللي من خلالها بيكزن الجورنالينج فعال في معالجة القلق.
من أجمل ما قيل عن كتابة اليوميات
“دفتر اليومية هو صوتك الذي لم يتغير تمامًا.”
– لوسي داكوس
لما بنكتب في دفتر يومياتنا، بنقوم بتحليل وفهم أفكارنا ومشاعرنا بشكل أعمق.
وظيفة الجورنالينج هنا هي تنظيم الأفكار المتشابكة وترتيبها في صورة منطقية،
وده يساعدنا على تحديد الأفكار والمشاعر السلبية ويساهم في تخفيف القلق.
مش بس كدة..
الجورنالينج ممكن يكون أداة تفاعلية لأننا ممكن نمارس الكتابة في وقت ونرجع في وقت تاني للتحليل والتفكير في اللي كتبناه.
ولما بنقرأ كتاباتنا في الجورنال ممكن وقتها نشوف الأنماط ونربط العوامل المؤثرة في قلقنا.
وهنا بنقدر نقوم بتطوير الوعي وفهم أفضل لنفسنا وللأوضاع اللي سببت لبنا القلق.
وهنا حابة أقولك مجموعة من النصائح لما خدي بالك منها وانتي بتمارسي كتابة اليوميات للتخلص من القلق والتوتر ……
1- حاولي تنتظمي في الكتابة في دفتر يومياتك يوميًا، حتى لو كانت لمدة قصيرة.
2- جربي أنواع مختلفة من التمارين الكتابية زي الكتابة الإبداعية أو الكتابة الموجهة.
3- دوري على الأدوات المناسبة ليكي زي قلم وورقة بيريحوكي في الكتابة أياً كان شكلهم أو تطبيقات على الموبايل الخاص بيكي.
4- خدي بالك إنه مش ضروري تكون الكتابة مقتصرة بس على الأحداث السلبية والمشاعر السلبية في حياتك، لكن ممكن ويا ريت تشمل الأمور الإيجابية.
5- حاولي تكتبي عن أي شيء بيسببلك السعادة والامتنان علشان تعزيزي الجانب الأيجابي من شخصيتك وتعزيزي الأمل والتفاؤل.
في النهاية..
ممكن يكون الجورنالينج أداة قوية للتحسين العقلي والعاطفي بشكل عام. وده بيحصل من خلال التفكير العميق والتحليل الذاتي في كتاباتنا.
ووقتها هنقدر نكتشف أنماطنا ونماذج سلوكنا ونتعلم ازاي نتعامل مع التحديات بشكل فعال.
وعلشان كدة إذا كنتي بتواجهي صعوبات في التعامل مع القلق والتوتر، ممكن تكون التجربة الجورنالية هي التجربة المناسبة ليكي للتخلص منهم.
لما هتستحدمي الجورنالينج بشكل منتظم وبمثابرة، هتلاحظي بعد فترة تحسن في صحتك العقلية والعاطفية وقدرتك على التعامل مع القلق بشكل أفضل.
جربي وابدأي النهاردة في الكتابة وساعدي نفسك وغيرك على التخلص من القلق واستعادة الراحة والسعادة.
