الثقة بالنفس هي أهم وسيلة بتساعدنا على تحقيق أهدافنا والتحفيز والحماس المستمر وعلشان كدة تعالوا في المقالة دي نعرف أكتر عن إيه هي الثقة بالنفس؟ إيه الفرق بينها وبين احترام الذات؟ ازاي تبني ثقتك بنفسك؟ وإيه اللي ممكن تتعرض ليه من تدني ثقتك بذاتك؟
إيه هي الثقة بالنفس؟
هي احساسك بإنك عندك القدرة والكفاءة والإمكانيات اللي تساعدك على التعامل مع المواقف المختلفة زي العلاقات الإجتماعية وتحقيق الأهداف وقوة الشخصية.
الشخص الواثق من نفسه قادر بتوفيق من ربنا إنه يواجه تحديات الحياة ويستفيد من الفرص اللي بيقابلها، هو شخص عنده وعي ذاتي عالي بنفسه واحتياجاته وإمكانياته المختلفة وعارف ازاي يوظفها لخدمة أهدافه في الحياة والأهم إنه عارف كل ده عن نفسه.
إيه اللي ممكن يحصل لو أنا شخصية مش واثقة في نفسها؟
هكون إنسانة مش حاسة بالأمان، عندي دايماً شك في نفسي وفي امكانياتي وفي اللي أقدر أحققه، دايماً هكون شخصية انهزامية بنسحب من المواجهة حتى لو معايا الحق، هخاف من الفشل فمش هدخل في تجارب جديدة.
أحياناً هنلاقي الشخصية اللي مش واثقة في نفسها متعجرفة وبتحاول تداري ضعف الثقة في إظهار نفسها بشكل مبالغ فيه في المواقف المختلفة، فتدعي إنها فاهمة كل حاجة لكن ماتلاقيهاش تتحاور معاك في مناقشة هادفة، ممكن تجادل، وماتقبلش النقد بأي حال لأنه بيظهر حقيقتها في عينيها وعيون اللي حواليها.
وأحياناً العكس بنلاقيها شخصية خوافة جداً، منطوية على نفسها دايماً بتخاف من السخرية على طريقتها في الكلام أو شكلها فبتهرب من التجمعات.
إيه الفرق بين الثقة بالنفس واحترام الذات؟
أوقات كتير هنلاقي تشابه بينهم في المعنى لكن واقعياً هم مختلفين، فيه فرق كبير لما أكون شخصية عارفة كويس امكانباتي والإنجازات اللي بقدر أحققها و اللي علشانها بحترم ذاتي لكن خوفي من الفشل وانتقادات الآخرين وسخريتهم بيخليني مقدرش أظهر بكامل شخصيتي وانجازاتي ولا يكون ليها تأثير في تعاملاتي وهنا أنا بكون شخص عندي احترام للذات لكن مفتقر للثقة بالنفس وده موقف حياتي.
ازاي ابني الثقة بالنفس؟
في البداية حابة أقول إن مقالات كتير اتكلمت في موضوع الثقة بالنفس بإستفاضة وقالت خطوات كتير هنتكلم عن بعضها في المقالة دي لكن بما اني بستخدم كتابة اليوميات ولمست أثرها في حياتي وحياة غيري هقولك على كام سؤال لازم تجاوبي عليهم قبل مانعرف أي خطوات عن ازاي ابني الثقة بالنفس.
اسألي نفسك…؟
إيه هو تعريف الثقة بالنفس بالنسبة ليكي؟
إيه أكتر المجالات اللي بتفتقري للثقة في النفس فيها في حياتك؟
إيه هي أكبر مخاوفك في الحياة؟ وهل حاولتي تعالجيها ولا لأ؟
ده غير أسئلة تانية كتير بنجاوب عليها سوا في جلسات الجروب كوتشنج الجماعية
تعالي بقا نعرف بعض الخطوات اللي ممكن تساعدك في اكتساب الثقة بالنفس…
1- اعرفي عن الله:-
ربنا هو اللي خلقنا وكرمنا على سائر المخلوقات ولما هتعرفي عنه أكتر هتعرفي ليه خلقك وإيه الدور اللي هتقومي بيه وإيه درجة أهمية الناس في حياتك وهتعلى ثقتك بنفسك لأنك من صنعه سبحانه وتعالى.
2- حددي هدف صغير:-
وقابل للتنفيذ ومدته صغيرة لأن كل أما هتزيد انجازاتك كل أما حواجز الثقة عندك هتتلاشى.
3- مارسي التدوين:-
علشان تقدري تعددي إنجازاتك وتركزي فيها دايماً وتديكي دافع وحماس وثقة تكملي في تحقيق أهدافك.
4- حددي هدف أصعب :-
بمرحلة صغيرة علشان تزودي خبراتك من انجازك اللي فات.
5- التكرار:-
تكرار الأهداف الصغيرة بيديكي الجرأة تخوضي تجارب جديدة دايماً وفي كل مرة ثقتك بنفسك هتزيد.
