من أصعب القرارات اللي ممكن نواجهها في حياتنا هي القرارات المتعلقة بوضعنا المالي، خصوصاً لو احنا عندنا عدم ثقة في قدرتنا على إدارة أموالنا.
الثقافة السائدة وخصوصاً في مجنمعاتنا العربية هي العمل من أجل الحصول على المال وكأننا بنلف في دايرة من أول ما نصحا لحد ماننام هدفها بس إننا نحصل على المال .
وبعد ما بنحصل عليه مبنعرفش للأسف نستمتع بحياتنا لأننا معندناش مهارة إدارة وضعنا المالي، وكل شهر نبدأ نفس الدوامة.
في كل الكتب السماوية تم ذكر إنفاق المال مش إدخاره ومع ذلك معظمنا إلا من رحم ربي بندخر المال خوفاً من المستقبل اللي في الأساس لا يعلمه إلا الله.
دايرة مفرغة بيلف فيها معظم الناس سببها الأساسي المعتقدات الغلط اللي اتزعت جوانا عن فكرة العمل والحصول على المال وأهميته في حياتنا، والمشكلة الأكبر فهمنا لمنطق الرزق في العقيدة الإسلامية.
المال موجود علشان يُنفق ولكن من غير اسراف ولو فيه إدخار بيكون لهدف، وهنا تيجي أهمية مهارة إدارة التمويل الشخصي.
إيه هو التمويل الشخصي؟
هي مهارة إدارة أموالك سواء كنت فرد أو أسرة وده بيتضمن إدارة الميزانية والإدخار والإستثمار وحتى إدارة تمويل المشاريع اللي بتمتلكها.
ليه التمويل الشخصي مهم؟
لأن الهدف من وجود الفلوس هي إني أعيش سعيدة وراضية مش أعيش في قلق دايماً بسبب عدم كفاية المال أو عدم القدرة على إدارته بشكل يحققلي السعادة والرضا والبركة في حياتي.
ومن أكتر الطرق المجربة لإدارة القلق والتوتر في حياتنا هي إننا ناخد خطوات فعلية تصبح عادات ثابتة في حياتنا تساعدنا على التخفيف من حدتهم، وبالنسبة للجانب المالي فأنا محتاجة أتعلم مهارة إدارة الإنفاق والإدخار والإستثمار.
محو الأمية المالية مهم جداً لنفسيتنا وصحتنا لأنه …
هيعلمك عادات جيدة للإدخار.
هيعرفك ازاي يكون عندك صندوق للطواريء.
هيشجعك على زيادة الوعي بالجانب المالي في حياتك وتحمل المسؤولية.
هيساعدك على الإستقرار المالي ووجود البركة في حياتك.
أما نقص المعرفة بكيفية إدارة الجانب المالي في حياتك هيتسبب في …
ديون مش هتقدري تسيطري عليها.
نقص في مدخراتك.
تعبك النفسي والصحي بسبب القلق المستمر.
إفلاس مستمر.
إزاي أبدأ أتعلم مهارة التمويل الشخصي؟
البحث على الإنترنت نص المعرفة.
التطبيق لكل خطوة عرفتيها من خلال البحث.
لو الطريق صعب عليكي تقدري تلجأي لكوتش متخصص ودي واحدة من الخدمات اللي بقدر بتوفيق من ربنا أقدمهالك.
وفي النهاية .. تعلم مهارة إدارة التمويل الشخصي خطوة مهمة في طريق نجاحك وشعورك بالسعادة بالرضا، لأن الجانب المالي جانب مهم جداً لا يقل أهمية عن الجانب النفسي والصحي بل بالعكس النجاح أو الفشل فيه بيأثر على جوانب حياتنا كلها.
