الحواجز النفسية تجاه المال حقيقة مش خيال وبين الحين والآخر بتقابلنا، لكن في معظم الأوقات مش بندرك وجودها، وخلال المقالة دي هنتعرف على بعض الحواجز اللي ممكن وانتي بتقرأيها تكتشفي إنها موجودة عندك.
أحياناً بيتخيل البعض إن علاج الإنهيار المالي بيكون في تكوين عادات مالية جديدة، ولكن حتى تكوين العادات كأداه مهمة في رحلة التغيير بيتطلب إزالة الحواجز النفسية المتعلقة بالنقطة دي.
قبل مانتكلم في أي شيء تعالو نعرف يعني إيه حواجز نفسية مالية؟
هي عبارة عن سلسلة من الأفكار أو العقليات أو المشاعر اللي بتُعيق طريقك في تحقيق النجاح المالي، ممكن تكون كيفية التخلص من الديون أو توفير مال أكتر أو تعدد مصادر الدخل أو توفير نمط حياة مختلف بمستوى رفاهية أعلى.
ودلوقتي هنتعرف على بعض الحواجز دي سوا …
أخطاء التفكير:-
وهي معتقدات وأفكار بتقيد نجاحك في الحياة زي مثلاً…
– أنا مش شخصية مدبرة .
– أنا فاشلة في إني أحوش فلوس.
– أنا مبقدرش أسيطر على مصاريفي.
وكتير من المعتقدات اللي اترسخت جوانا من الطفولة وأساليب التربية، الخبر الحلو هنا إن المعتقدات دي ممكن تغييرها بمرور الوقت.
ببساطة مع كل معتقد سلبي هتكتبي عكسه بشكل إيجابي وهتستخدمي المعتقد الإيجابي الجديد في كل مرة بتعبري فيها عن نفسك، ومع الوقت والتكرار بنتصرف بالمعتقد الجديد.
يبقا بدل التفكير في الشيء اللي ماتقدرش تعمله فكري في اللي تقدري تعمليه علشان تقدري تدربي نفسك على عقلية النمو، وبجانب كل ده حاولي تبدأي يومك بشكل إيجابي، تصلي، تقولي أذكار معينة، تعملي جلسة استرخاء،والأفضل تمارسي التدوين هيفيدك جداً، المهم إنك تحاولي تخلي تركيزك على كل ما هو إيجابي في يومك.
أهداف غير محددة:-
عدم وجود أهداف محددة بيستهلك وقتك وجهدك وبيستنفذ الحماس جواكي، وحتى لو عندك أهداف محددة فانتي محتاجة تحددي ليها وقت لتحقيقها وإلا هتفضلي مركزة عليها طول الوقت ولكن مبتنجزيش أي خطوة ناحيتها لأنك مش مرتبطة بوقت محدد لتنفيذها.
فلو عندك هدف كبير قسميه لأهداف صغيرة جداً وحددي لكل هدف منها معاد تلتزمي بيه، أهداف سنوية وشهرية واسبوعية ويومية ودي أفضل طريقة تحافظي بيها على حماسك مستمر طول الوقت.
مشاعرك السلبية تجاه نجاحات الآخرين:-
من أكتر الحواجز النفسية اللي بتأثر بشكل سلبي على الجانب المالي وعلى حياتنا بشكل عام، طول ماحنا مركزين على نجاحات الآخرين وحاسين اننا نقدر نحقق أفضل منهم فبنسعى في اتجاهات كتير وبنصرف بشكل غير مدروس أو مفهوم علشان بس نثبت لنفسنا إننا نقدر نتفوق عليهم، والعلاج الأهم للنقطة دي هو إننا نعلي الوعي الذاتي الخاص بينا، ونسعى لفهم نفسنا واحتياجاتنا ونقاط قوتنا اللي ممكن من خلالها نحقق النجاح المناسب لينا.
جلد الذات:-
جلد الذات على الأخطاء المالية اللي بنرتكبها واحد من أهم الحواجز النفسية تجاه المال، اللوم المستمر ومعاتبة النفس بإستمرار بيقوي المعتقدات السلبية الداخلية.
والحل هنا هو مسامحة النفس على أخطاء الماضي، والتعلم منها، وعدم تكراراها علشان أقدر أحقق أي إنجاز مالي أو في حياتي عموماً.
تجنب متابعة أموالي الشخصية:-
معنديش خطة ممنهجة لصرفها ولا عارفة إيه هي مصادر دخلي وكل اللي بيجي بيتصرف بدون وعي، وهنا لازم توقفي مع نفسك وتعرفي إيه الأسباب النفسية ورا الخوف من تحمل مسؤولية متابعة أموالك حتى لو هتلجأي لمتخصص.
تحقيق المال كهدف مهم في الحياة:-
المال وسيلة لإسعادنا ومش غاية نسعى لتحقيقها بدون هدف وإلا هنفضل طول الوقت بنسعى لتحقيق مزيد من المال ومش هنعرف نتحكم في نفاقاتنا، ونلف في حلقة مفرغة آخرها حياة بدون شغف أو معنى، خالية من السعادة والرضا.
وفي النهاية الجانب المالي واحد من أهم جوانب حياتك لكن بيأثر على حياتك كلها سواء بشكل سلبي أو إيجابي، واهتمامك بإزالة الحواجز النفسية اللي فاتت مهم جداً يكون أولوية من أولويات حياتك علشان تحققي السعادة والرضا والإستقرار والبركةفيها.
